خیبر میں ساڑھے 6 سال بعد پولیو کیس رپورٹ، ملک میں رواں سال کیسز کی تعداد 6 ہوگئی

خیبرپختونخوا کے ضلع خیبر میں تقریباً ساڑھے 6 سال بعد پولیو کا کیس سامنے آیا ہے، جس کے بعد 2026 میں پاکستان میں رپورٹ ہونے والے پولیو کیسز کی مجموعی تعداد 6 ہوگئی ہے۔

اسلام آباد میں قائم ریجنل ریفرنس لیبارٹری فار پولیو ایریڈیکیشن نے ضلع خیبر سے رواں سال کے چھٹے پولیو کیس کی تصدیق کی ہے۔

محکمہ صحت کے مطابق متاثرہ بچہ 7 سالہ لڑکا ہے، جس کا تعلق ضلع خیبر کی تحصیل جمرود، یونین کونسل غنڈی اے سے ہے۔ بچے میں بائیں جانب چہرے کے فالج کی علامات ظاہر ہونے کے بعد کیس جمرود میں قائم ایکٹو سرویلنس سائٹ پر رپورٹ کیا گیا۔

بعد ازاں بچے کے نمونے مزید جانچ کے لیے لیبارٹری بھیجے گئے، جہاں پولیو وائرس کی تصدیق ہوئی۔

حکام کے مطابق ضلع خیبر میں تقریباً ساڑھے 6 سال کے وقفے کے بعد پولیو کیس رپورٹ ہوا ہے۔ ضلع خیبر پشاور بلاک کا اہم حصہ ہے اور پولیو وائرس کے حوالے سے حساس علاقوں میں شمار کیا جاتا ہے۔

رواں سال اب تک پاکستان میں 6 پولیو کیسز رپورٹ ہوچکے ہیں، جن میں سے 5 کا تعلق خیبرپختونخوا جبکہ ایک کا سندھ سے ہے۔

2026 میں سندھ کے ضلع سجاول سے ایک کیس رپورٹ ہوا، جبکہ خیبرپختونخوا میں بنوں سے 3، وزیرستان سے ایک اور ضلع خیبر سے ایک کیس سامنے آیا ہے۔