خیبرپختونخوا میں دہشت گردی کے خلاف انٹیلی جنس بیسڈ آپریشنز جاری رکھنے کا فیصلہ، ایپکس کمیٹی

گورنر خیبرپختونخوا فیصل کریم کنڈی کی زیرِ صدارت گورنر ہاؤس پشاور میں صوبائی ایپکس کمیٹی کا اجلاس ہوا، جس میں دہشت گردی کے خاتمے، پائیدار امن کے قیام اور پولیس و محکمہ انسدادِ دہشت گردی (سی ٹی ڈی) کی استعداد بڑھانے کے لیے اہم فیصلے کیے گئے۔

اجلاس میں پولیس اور سی ٹی ڈی کو جدید آلات، گاڑیاں، بکتر بند گاڑیاں، مؤثر اسلحہ اور اضافی نفری سمیت ضروری وسائل فراہم کرنے کا فیصلہ کیا گیا۔ فورم نے دہشت گردی کے خلاف انٹیلی جنس کی بنیاد پر کارروائیاں جاری رکھنے اور امن و امان کی بہتری کے لیے تمام دستیاب وسائل بروئے کار لانے کی ہدایت کی۔ اجلاس میں وفاقی وزیرِ داخلہ محسن نقوی، ایڈوائزری کونسل کے ارکان، کور کمانڈر پشاور، چیف سیکریٹری، انسپکٹر جنرل پولیس اور دیگر اعلیٰ سول و عسکری حکام نے شرکت کی۔

اجلاس کے آغاز میں دہشت گردی کے خلاف جنگ میں جانوں کا نذرانہ پیش کرنے والے اہلکاروں کو خراجِ عقیدت پیش کیا گیا اور ان کے ایصالِ ثواب کے لیے فاتحہ خوانی کی گئی۔ شرکا نے صوبے کی مجموعی سکیورٹی صورتحال کا جائزہ لیتے ہوئے دہشت گردی کے خاتمے اور دیرپا امن کے قیام کے لیے متعلقہ اداروں کے درمیان مؤثر رابطے اور مشترکہ حکمتِ عملی پر زور دیا۔ ایپکس کمیٹی نے واضح کیا کہ دہشت گردی کا خاتمہ اور شہریوں کا تحفظ تمام ریاستی اداروں کی مشترکہ ذمہ داری ہے، جس پر کوئی سمجھوتہ نہیں کیا جائے گا۔

اجلاس میں تعلیم، صحت، شہری سہولیات اور پسماندہ و متاثرہ علاقوں میں بنیادی خدمات کی فراہمی کو بھی ترجیح دینے کا فیصلہ کیا گیا۔ فورم نے ان شعبوں کی بہتری کو عوامی تحفظ، سماجی استحکام اور پائیدار امن کے لیے ضروری قرار دیا۔ شرکا نے اتفاق کیا کہ عوامی ضروریات، مقامی ترجیحات اور تجاویز کو پالیسی سازی میں شامل کیا جائے گا، جبکہ سرکاری خدمات کی عوام تک رسائی بہتر بنانے کے لیے مشترکہ اقدامات کیے جائیں گے۔ اجلاس کے اختتام پر صوبے میں امن، استحکام اور سماجی و معاشی ترقی کے لیے تمام متعلقہ اداروں کے درمیان تعاون جاری رکھنے کے عزم کا اعادہ کیا گیا۔