ٹانک میں یومِ تشکر کی ریلی کا اعلان، پولیس ہائی الرٹ، ختمِ نبوت چوک پر سکیورٹی سخت

ضلع ٹانک میں یومِ تشکر کے موقع پر پاکستان پیپلز پارٹی اور پاکستان مسلم لیگ (ن) کی مقامی قیادت اور کارکنان کی جانب سے ریلی نکالنے کے اعلان کے بعد پولیس نے سکیورٹی انتظامات سخت کر دیے ہیں۔

ختمِ نبوت چوک پر پولیس کی بھاری نفری تعینات کر دی گئی ہے، جہاں ایس ایچ او سمیع برکزئی اور ایس ایچ او طاؤس خان پولیس اہلکاروں کے ہمراہ سکیورٹی انتظامات کی نگرانی کر رہے ہیں۔

رپورٹ کے مطابق علاقے میں مشکوک افراد کی چیکنگ اور نگرانی جاری ہے، جبکہ ریلی کے ممکنہ راستوں اور اہم مقامات پر بھی خصوصی حفاظتی اقدامات کیے گئے ہیں۔

پولیس اہلکاروں کو کسی بھی ناخوشگوار واقعے سے نمٹنے کے لیے الرٹ رکھا گیا ہے۔ سکیورٹی اقدامات کا مقصد ریلی کے دوران امن و امان برقرار رکھنا اور شہریوں کے جان و مال کا تحفظ یقینی بنانا ہے۔