نائیجیریا میں فوجی ہیلی کاپٹر تباہ، 32 افراد سوار تھے

نائیجیریا کے جنوب مغربی علاقے میں 32 افراد کو لے جانے والا فوجی ہیلی کاپٹر حادثے کا شکار ہوگیا، حکام کے مطابق ملبہ مل گیا جبکہ سرچ اینڈ ریسکیو آپریشن جاری ہے۔

نائیجیریا میں ایک فوجی ہیلی کاپٹر گر کر تباہ ہوگیا، جس میں عملے سمیت مجموعی طور پر 32 افراد سوار تھے۔ حادثے کے بعد امدادی ٹیمیں متاثرہ مقام پر پہنچ گئی ہیں اور ہیلی کاپٹر میں موجود افراد کی تلاش اور ممکنہ جانی نقصان کا تعین کیا جا رہا ہے۔

نائیجیریا کے وزیر ہوا بازی فیسٹس کیامو کے مطابق ہیلی کاپٹر میں 25 مسافر اور عملے کے 7 ارکان موجود تھے۔ حادثہ ملک کے جنوب مغربی حصے میں واقع اوندو ریاست کے شہر اگبوکوڈا میں ایک نیول بیس کے قریب پیش آیا۔

حکام کا کہنا ہے کہ حادثے کے بعد ہیلی کاپٹر کا ملبہ تلاش کرلیا گیا ہے، تاہم فوری طور پر یہ واضح نہیں ہوسکا کہ اس میں سوار افراد میں سے کتنے محفوظ ہیں یا حادثے میں کوئی جانی نقصان ہوا ہے۔

متاثرہ علاقے میں سرچ اینڈ ریسکیو آپریشن جاری ہے اور امدادی ٹیمیں ہیلی کاپٹر میں سوار مسافروں اور عملے کے بارے میں معلومات حاصل کرنے کی کوشش کر رہی ہیں۔

ابتدائی طور پر حادثے کی وجہ بھی سامنے نہیں آسکی۔ متعلقہ ادارے جائے حادثہ کا جائزہ لے رہے ہیں اور توقع ہے کہ امدادی کارروائی میں پیش رفت کے بعد حادثے کی نوعیت اور ممکنہ جانی نقصان کے حوالے سے مزید تفصیلات جاری کی جائیں گی۔

حکام نے فی الحال یہ بھی واضح نہیں کیا کہ فوجی ہیلی کاپٹر نے اپنی پرواز کہاں سے شروع کی تھی اور اس کی منزل کیا تھی۔