کرک: پولیس اور نامعلوم افراد کے درمیان فائرنگ کے تبادلے میں ڈی ایس پی سی ٹی ڈی سمیت چار اہلکار شہید

کرک کے علاقے خرم محمدزئی کی حدود چرپرا میں سرچ اینڈ اسٹرائیک آپریشن کے دوران پولیس پر فائرنگ کے نتیجے میں ڈی ایس پی کاؤنٹر ٹیررازم ڈیپارٹمنٹ (سی ٹی ڈی) عمران الدین سمیت چار پولیس اہلکار شہید ہوگئے۔ پولیس کے مطابق علاقے میں آپریشن تاحال جاری ہے۔

 
شہید ہونے والوں میں ڈی ایس پی سی ٹی ڈی عمران الدین، ایس ایچ او تھانہ لتمبر افضل اعوان اور پولیس اہلکار امجد اور کاظم شامل ہیں۔ پولیس کے مطابق علاقے میں دہشت گردوں کی موجودگی کی اطلاع پر سرچ اینڈ اسٹرائیک آپریشن کیا گیا، جس کے دوران پولیس اور دہشت گردوں کے درمیان فائرنگ کا تبادلہ ہوا۔ فائرنگ کے نتیجے میں چار پولیس اہلکار شہید ہوگئے۔

پولیس کے مطابق ایس ایچ او تھانہ لتمبر افضل اعوان کی میت ڈسٹرکٹ ہیڈکوارٹر اسپتال منتقل کردی گئی ہے، جبکہ علاقے میں سرچ اینڈ اسٹرائیک آپریشن جاری ہے۔