اسلام آباد مارچ، قانون نافذ کرنے والے ادارے جدید ترین آلات سے لیس

اسلام آباد: وفاقی حکومت نے پی ٹی آئی کے ممکنہ اسلام آباد مارچ کے پیش نظر قانون نافذ کرنے والے اداروں کی نفری بڑھاتے ہوئے اہلکاروں کو جدید آلات سے لیس کر دیا ہے۔

دی نیوز کی رپورٹ کے مطابق ایک اعلیٰ عہدیدار نے بتایا کہ ماضی کے احتجاجی واقعات سے حاصل ہونے والے تجربے کو مدنظر رکھتے ہوئے اس مرتبہ سکیورٹی انتظامات مزید وسیع کیے گئے ہیں۔

رپورٹ میں عہدیدار کے حوالے سے دعویٰ کیا گیا ہے کہ اس مرتبہ تقریباً 38 ہزار اہلکار تعینات کیے گئے ہیں، جبکہ پی ٹی آئی کے گزشتہ مارچ کے دوران اہلکاروں کی تعداد 20 ہزار سے کم تھی۔

عہدیدار نے 26 نومبر 2024 کو پی ٹی آئی کے اسلام آباد مارچ اور 12 اکتوبر 2025 کو مریدکے میں تحریک لبیک پاکستان کے ساتھ ہونے والے تصادم کا حوالہ دیتے ہوئے کہا کہ ان واقعات سے حاصل ہونے والے تجربے کی روشنی میں موجودہ انتظامات کیے گئے ہیں۔

رپورٹ کے مطابق قانون نافذ کرنے والے اہلکاروں کی تعداد میں اضافے کے ساتھ انہیں جدید آلات بھی فراہم کیے گئے ہیں۔