جنوبی وزیرستان لوئر: دژہ غوندی چوک میں نامعلوم مسلح افراد کی فائرنگ، پولیس کانسٹیبل شہید

جنوبی وزیرستان لوئر کے علاقے دژہ غوندی چوک میں نامعلوم مسلح افراد کی فائرنگ سے پولیس کانسٹیبل غلام حسین شہید ہوگئے۔

پولیس ذرائع کے مطابق جنوبی وزیرستان لوئر کے علاقے دژہ غوندی چوک میں نامعلوم مسلح افراد نے پولیس کانسٹیبل غلام حسین کو فائرنگ کا نشانہ بنایا، جس کے نتیجے میں وہ موقع پر ہی دم توڑ گئے۔

مقتول کی شناخت غلام حسین ولد میٹا خان کے نام سے ہوئی ہے، جن کا تعلق تحصیل وانا کے علاقے غواہ خواہ سے بتایا جاتا ہے۔

واقعے کے بعد علاقے میں امن و امان کی صورتحال پر سوالات اٹھنے لگے ہیں۔ شہریوں کا کہنا ہے کہ

خیبرپختونخوا میں ایمرجنسی کے نفاذ اور گورنر راج کے ذریعے امن و امان بہتر بنانے کے حکومتی دعوؤں کے باوجود جنوبی وزیرستان میں قتل، فائرنگ اور تشدد کے دیگر واقعات کا سلسلہ جاری ہے۔

شہریوں کے مطابق مسلسل پرتشدد واقعات کے باعث عوام میں خوف و ہراس اور عدم تحفظ کا احساس بڑھ رہا ہے، جبکہ پولیس اہلکاروں کو بھی نشانہ بنایا جا رہا ہے۔

شہریوں نے متعلقہ حکام سے مطالبہ کیا ہے کہ علاقے میں امن و امان کی بحالی، جرائم پیشہ عناصر کے خلاف مؤثر کارروائی اور شہریوں سمیت پولیس اہلکاروں کے جان و مال کے تحفظ کے لیے عملی اقدامات کیے جائیں۔