شمالی وزیرستان میں دہشت گردوں کے خلاف کارروائی، 7 ہلاک، اسلحہ و گولہ بارود برآمد

شمالی وزیرستان: سکیورٹی فورسز نے شمالی وزیرستان میں خفیہ اطلاعات کی بنیاد پر کارروائی کرتے ہوئے مبینہ طور پر فتنہ الخوارج سے تعلق رکھنے والے 7 دہشت گردوں کو ہلاک کر دیا۔

سکیورٹی ذرائع کے مطابق علاقے میں دہشت گرد عناصر کی موجودگی سے متعلق معلومات موصول ہونے کے بعد عزمِ استحکام وژن کے تحت انٹیلی جنس بیسڈ آپریشن کیا گیا۔

ذرائع نے بتایا کہ آپریشن کے دوران دہشت گردوں کے متعدد ٹھکانوں کو بھی تباہ کیا گیا، جبکہ کارروائی مکمل ہونے کے بعد ہلاک ہونے والے افراد کے قبضے سے بڑی مقدار میں اسلحہ اور گولہ بارود برآمد ہونے کی اطلاع ہے۔

یہ کارروائی ایسے وقت میں سامنے آئی ہے جب شمالی وزیرستان میں ایک روز قبل بھی سکیورٹی فورسز کی جانب سے 9 دہشت گردوں کو ہلاک کرنے کی اطلاع دی گئی تھی۔

سکیورٹی ذرائع کی فراہم کردہ تفصیلات کے مطابق دونوں کارروائیوں میں مجموعی طور پر 16 دہشت گردوں کی ہلاکت کی اطلاع سامنے آئی ہے۔